اليوم ممكن تلاقي أكثر من 100 فيديو يتكلموا عن تخطيط القلب وأهم أمراض الدم وأكثر من ألف شخص عمل ملخصات في هذه المواضيع .لكن كم مرة لقيت شخص يتكلم عن مشكلة في حياتك ودراستك كطالب طب؟ تفتكر كم مره حطيت لايك على "ثريد" قالوا لك لو مشغول أرجع لها بعدين وما رجعت لها؟
ممكن اليوم تدخل على موقع تسجيل الجامعة وتقرأ كلام كثير وخطوات متسلسلة لكن في الواقع تكتشف أنو المكتوب مو نفس القصة اللي حصلت لك. كم مرة أرسلك شخص بالخاص في تويتر أو غيرها من المواقع يسألك تفاصيل عن جامعتك؟ ما سألت نفسك لو هذا الشخص قدر يجي ويسألك كم شخص ما يحب أو ما يعرف يسأل مين؟
طيب ليش ما يكون في صندوق صغيرة و مقسم فيه كل تجاربنا؟ وكل شخص وده بموضوع يدور بين الأوراق ويوصل لتجربة آسرع.. نحط فيه القصص اللي واجهتنا وعرفنا نعديها من طرق المذاكرة إلى كيف أجيب نسبة عالية في اختبار الهيئة......) مدونة ما تّحكي عن أبحاث أو دراسات لمشاكلنا بقدر ما تحكي تجاربنا بواقعية وبعيد عن المثالية . ومثل ما يقولون كل الطرق تؤدي إلى روما ،ممكن الحل اللي أنا أتخذته ينفع معك و ممكن إنت عشت نفس التجربة وسلكت طريق آخر ووصلت ! وتكتب قصتك هنا جمب قصتي ، قصة بنائنا للجسر ووصلنا للجهة الأخرى ، لعل وحدة من هذي القصص تكون ملهمة لشخص ما من بعدنا أنه يعدي الجسر بسهولة.
باختصار هيا مدونة صغيرة نقدر نكتب فيها قصصنا في مجال الطب ، وقصة على قصة يكون عندنا مكتبة كبيرة من التجارب والقصص المثرية في مكان واحد ومرجع للناس اللي راح يتبعون خطاك . بنحاول يكون عندنا قصص نحكيها اسبوعية ، ودك تكون جزء منها وعندك قصص رهيبة تشاركنا إحداثها من الألف إلى الياء ؟
ليش لا تواصل معنا عبر حسابنا بتويتر.
أعداد: هتان عارف، تحرير: نوف النهدي، تصميم: اسراء متولي