طيب لو اقلك انه الحل في هواياتك؟ دولة ايسلندا قدرت تغير حياة مراهقينها المدمنين إلى مبدعين وموهوبين، مو بأدوية أو علاجات اكتشفوها لكن بالهواية!
قلت نسبة استعمال المراهقين للكحول من 42 ٪ فيعام1998 إلى 5٪ فيعام 2016! قلت نسبةالمدخنينمن المراهقين من23٪ إلى3 ٪ الأرقام كفيلة تثبت قد ايش الهوايات لها تأثير في نفسيتنا، وكيف عملت نقلة في عدد كبير من حياة مراهقين، وخرجتهم من دوامة الإدمان.
اول حاجة خلينا نعرف الفرق بين الموهبة والهواية، الهواية والموهبة وجهان لعملة وحدة، وكثير مننا يحسب انها معادلة مافي موهبة = مافي هواية ! الاثنين كل ما اديتهم كل ما رجعولك في نفسيتك وعقليتك وتحسين جودة حياتك عموما. لكن طبيعة الاثنين تختلف فالموهبة امر فطري و اللي الشخص ينولد به زي الناس اللي أصواتهم حلوة في الغناء، أما الناس الي يولدوا بأصوات مو حلوة يقدروا يدربوها بتمارين صوتية ويوصلوا لصوت جميل نمو الهواية. يعني خلينا نتفق على أول ُبعد انه مافي انسان بدون هواية او ما يقدر ينمي هواية.
فيه فريق اسمه suplift يعتقدوا انه مافي انسان بلا هواية، وعشان يثبتوا كلامهم عملوا بوصلة الهوايات، وهيا عبارة عن دائرة صنفوا فيها جميع انواع الهوايات لأربعة اقسام رئيسية واربعة اقسام فرعية يشترك فيها نوعين رئيسيين. فإنت ممكن تكون فعلا حاولت تجرب اكثر من نوع هواية ولكن ولا وحدة ناسبتك لانه ممكن تكون جربت هوايات من نوع واحد زي مثلا الحركية، فتجي لكورة القدم وما تلاقي نفسك فيها وبعدها تجرب التايكوندو وبرضوا ما تلقى نفسك فيه، هذه ما يعني انه ما عندك هوايات هذا معناته ما جربت أنواع اكثر أنا مؤمنة ان كل الناس عندهم القدرة انهم يكسبوا كل انواع الهوايات ال٨ اللي فوق ويخلوها متنفس لهم
من الضغوطات اللي نواجهها، لكن نسبة انطلاقتك وتطورك في هوايتك تختلف، فمثلا اتعلمت لهوايات من نوعين مختلفة زي حرفية وفكرية ولقيت نفسي منطلقة وتطوري سريع في الهوايات الحرفية، وفي الهوايات الفكرية تطوري فيها ابطأ فهنا ممكن اعتقد انه الهوايات الفكرية مو في مجالي لأنه تطوري فيها بطيء.
كيف أعرف نوع الهواية الي بيناسبني؟ التجربة خير برهان، منصات كثيرة توفر تجارب لأنواع الهوايات المختلفة، وفكرة منصات الهوايات هيا انك تجرب الهواية لمرة واحدة مع ممارس لهذه الهواية، ومن هذه المنصات: - منصة suplift - منصة هاو وغير التجربة الواقعية suplift عاملين اختبار مجاني ويطلع لك المتوقع بنوع الهوايات المناسبة لك،
* خلينا نجي للنقطة اللي بعدها: ممكن قد مرت عبارات في دماغك زي انا اخاف اجرب وما القى نفسي في شيء وفي النهاية احس اني انسان بلا هواية، او انه انا قد جربت وما قد زبطت معايا و هذه المرة ما حتكون فرق، او انا ما حقدر ابدع في الشيء هذا وناس كثير سووه وهما احسن مني ما حكون في مستواهم.
ايش تعريف النجاح والفشل عندنا؟ هل الفشل ان ارسم الرسمة وبيكون فيها عدم اتقان؟ او انه انهزم ١٠ مرات وافوز مرة في الشطرنج؟ او العب تايكوندو واخرج متلطشة؟ لكن السؤال الي لازم تسأله نفسك انا بكتسب هوايات عشان استمتع وافرغ بيها عن الضغط ولا عشان اخذها كحرفة واطور نفسي سريع فيها؟ ثاني بعد: لا تخلوا متنفسكم من ضغط الحياة هو مصدر الضغط، لانه احنا بنتكلم عن الهوايات مو الحرفة او الاحتراف. لا بأس انه احنا نحاول ونتعلم ولكن البأس انه احنا نختار كملة " انا ما عندي هواية " كمهرب لنا، الإنسان ما ينولد متعلم الحروف والأرقام، ونفس الشيء الهواية اعطي نفسك حق التعلم
طيب انا ايش بستفيد لمن اعرف المعلومات هذه كلها عن الهوايات؟ وخليني احكيك من تجربتي في اول ترم لي بالطب اخذت بنصيحة الهوايات، وبديت اتعلم تايكوندو و اللي كان متنفس ومتعة بنفس الوقت من ضغط الجامعة، كنت اخرج من التايكوندو قادرة اتنفس براحة، حاسة بإنجاز في يومي متحفزة ومستعدة ابدأ انجز، لكن نفسي اللوامة خلتني اشوف ان الوقت اللي احطه في التايكوندو لازم احطه في الدراسة، وفعلا اخر شهرين في الترم حطيت الثلاثة ساعات الي كنت احطها في التايكوندو للدراسة، وتتوقعوا ايش الي حصل؟ درجاتي كانت اسوء بشكل رهيب ودخلت في ضغط شديد للاسف ايش علاقة التايكوندو ) الهواية ( بتقليل الضغط ؟ العامل السحري في القصة فوق هو الاندروفين المعروف ب natural pain relief هو الي بيقلل لي شعور الضغط والتوتر من الدراسة واحسن طريقة تخرج بيها الاندروفين بإنك تجرب حاجة جديدة أو تعمل هواية تحبها، ويجي معاها الدوبامين الي بيديك شعور السعادة بالإنجاز الي عملته، وبجهة معاكسة أعراض نقص الاندروفين هيا اكتئاب، قلق، واضطرابات نوم. فا انا ممكن اقعد اذاكر طول اليوم مع شعور ضغط وتوتر ونوم مضطرب، وممكن اعطي ضريبة من وقتي ساعة عشان الاقي رفاهية الفرحة وقدرة للإنجاز بنفسية احسن. انت لك ان تتخيل كيف بتكون حياتك مع الاندروفين.
وبكذا انت قول لي هل هوايتك ضياع لوقتك ؟
كتابة و تصميم : اسراء متولي تحرير : نوف النهدي