هل لو فشلت في مادة معناتها انك فاشل و هذه نهاية الطريق؟ هل ما أقدر أتميز في مجالي بسبب هذا الفشل الشنيع ؟
سؤال سألته نفسي لما كنت أدرس مادة من موادي، بدأت الفكرة والخوف من الفشل لما نزلت درجات اختبار ال Mid-term وهنا كانت الصدمة والنتيجة الي كنت مو متوقعها، صح خبصت في الاختبار بس اتوقعت درجة أحسن، درجتي كانت 5.5/15 😔
كطالب متفوق ودايما درجاته عالية تعتبر صدمة، نفسيتي تعبت وصرت ماني متقبل المادة أكثر، كل مايمر الوقت صرت أحس نفسي مو فاهم ولاني قادر أذاكر كويس، مشي الوقت وجاء وقت اختبار الفاينل وهنا كانت أول مرة في حياتي أحسب كم باقيلي درجة على النجاح 😭، وهذا كان خطأ كبيييير وقعت فيه للأسف، بسبب هذا التفكير والخوف من المادة صرت أذاكر وفعليا كأني بس أقرأ السلايد ومجرد أروح للي بعده أنسى كل شيء وما كأني ذاكرت أو تعبت، استمرت المعاناة هذي طول أيام مذاكرتي وكملت المعاناة لما جاء وقت الاختبار وشفت الاسئلة، هنا رجعت الأفكار وقلت عبدالله هل راح تحمل هذي المادة؟ هل معقول ما راح تعديها
الحمدلله حليت وطلعت من الاختبار وكنت متطمن شويتين إني حأنجح وكنت عارف إني ماراح أجيب درجة عالية بس المهم أنجح، ماكملنا نص ساعة بعد الاختبار الا وتنزل الدرجة وكانت *65*، لأول مرة في حياتي أجيب *D+*، هنا حسيت بالصدمة خصوصا إن كان عندي بونس 3 درجات ودرجتي الحقيقية 62، وقتها قعدت أستوعب عبدالله متخيل بينك وبين الرسوب 3 درجات بس !!!
فشلي في هذه المادة ماكان نهاية مشواري، بالعكس أعطاني الدافع إني أشد حيلي أكثر وأكثر وفعلا السنة اللي بعدها كنت كل ترم أجيب A+ في أغلب موادي وكمان جبت معدل 4/4 في أحد الأترام الي بعدها، المهم من فشلنا إننا نتعلم منه ونعدل ونحسن من نفسنا، في حالتي اكتشفت أكثر من حاجة كنت أسويها ولعلها كانت سبب في فشلي وأهم خطأ وقعت فيه هو الاستسلام وفقدان الرغبة في الاستمرارية، كنت أسمح لهذه الأفكار إنها تتمكن مني ويوم بعد يوم بديت أهمل هذي المادة بسبب إني خلاص فقدت أملي في إني أجيب فيها درجة عالية، بعدها غيرت من طريقة تفكيري وغيرت شويتين في طريقة مذاكرتي والحمدلله لقيت النتيجة في الأترام اللي بعدها ووصلت لسنة الامتياز وأنا من المتفوقين ومن الأوائل على دفعتي، صح انتهت هذه المادة بدرجة ماترضيني ولكن المهم إني اتعلمت منها وحسنت وغيرت من نفسي
من هذه الحكاية بأعطيكم اللي اتعلمته، دائما وأبدا إبذل جهدك وخلي الباقي على الله، لا تخلي في بالك أفكار سيئة عن الشيء اللي متعبك، سواء كانت مادة ولا أي شيء ثاني في حياتك، التفكير هذا حيخلي عقلك الباطني يتحكم فيك وتبدأ تستسلم للأمر الواقع، وفعلا ممكن تفشل بسبب هذا التفكير
وأقولكم أحيانا الفشل هو بداية الطريق للنجاح، ممكن نتعلم من فشلنا، نتعلم ونحسن نفسنا ونعتبرها فرصة، لأن النجاح الدايم يعطي شعور إن أنا شخص كامل وماعندي أخطاء لازم أصلحها، لكن الفشل يوضح لك نقاط الضعف، بالفشل حنقدر نوصل ونتحسن ونكون مبدعين ودائما الأوائل في الأماكن الي نكون فيها
حتى لو فشلنا لانلوم نفسنا ونحملها فوق طاقتها، تذكر إن في كل شيء خير وممكن مانعرف سببها الا بعد سنين وسنين
كتابة: عبدالله هاني الجهني تحرير : نوف النهدي تصميم: اسراء متولي