يا جماعة الخير، دايم تجينا فكرة إننا نبغى نكتب بحث علمي — بس لما نجلس قدام اللابتوب… ما ندري من وين نبدأ!
أنا اليوم بجمع لكم الخطوات بشكل مبسط وسلس يخليك تبدأ من الصفر وتوصل إن شاء الله لبحث ينرفع الراس فيه:
أول شي: يكون معك مشرف
قبل لا تبدأ أصلاً، ضروري تختار دكتور أو دكتورة يكونوا مشرفين عليك في البحث.
ليش؟
- يساعدونك في اختيار موضوع مناسب
- يصححون لك الأخطاء اللي ممكن تغفل عنها
- يمشون معك خطوة بخطوة لين تقدم بحثك بشكل علمي سليم
- وأهم شي: وجودهم يعطي البحث قوة واعتماد رسمي
عادة المشرفين يكونون من تخصصك أو من لهم خبرة في نفس المجال اللي بتبحث فيه.
١- اختر موضوعك بعناية
لا تختار أي موضوع والسلام! شوف وش المجالات اللي تهمك أو فيها مشاكل تحتاج حلول.
ولها علاقة بتخصصك او حتى تكون تنعكس على شيء آخر مثلاً: “نسبة التزام مرضى الضغط بالأدوية في العيادات الأولية”.
الموضوع لازم يكون:
- واضح
- قابل للبحث
- له مراجع كفاية
٢- ابحث واقرأ كثير
قبل تكتب حرف واحد، لازم تغوص في بحر الدراسات السابقة.
اقرأ الأبحاث اللي نشرت قبلك، وشوف وين الثغرات اللي تقدر تضيف فيها علم جديد.
(جوجل سكولار، PubMed، ResearchGate كلهم أصحابك هنا.)
٣- حدد سؤالك البحثي
بعد ما تقرأ وتفصفص، صغّر الموضوع بسؤال محدد.
مثال: “هل في علاقة بين عدد الأدوية الموصوفة ومدى التزام مرضى الضغط بالعلاج؟”
٤- خطط لطريقة الدراسة
حدد نوع البحث:
- مراجعة أدبية
- دراسة استطلاعية
- تجربة سريرية
- دراسة حالة
ثم حدد العينة، الأدوات، وأسلوب جمع البيانات.
٥- ابدأ بالكتابة
قسم البحث غالباً يكون كذا:
- المقدمة: ليش اخترت الموضوع؟
- المواد والطريقة: كيف جمعت البيانات؟
- النتائج: وش طلع معك؟
- المناقشة: تفسر النتائج وتقارنها بالدراسات السابقة.
- الخاتمة: وش أهم النقاط اللي طلعت فيها.
٦- المراجع ثم المراجع لا تنسى توثق كل معلومة نقلتها. فيه برامج مره تسهّل عليك مع السنوات مثل:
- EndNote
- Mendeley
- Zotero
٧- راجعه أكثر من مرة
اطلب من زملائك أو مشرفك يقرأ البحث قبل تسليمه عشان تتأكد من جودة الكتابة وخلوها من الأخطاء
كتابة نوف النهدي تصميم: في جبران