كثيرا ما نسمع عن فلان - محمد مثلا - (ماشاء الله انقبل في كلية الطب والجراحة ،هنيئا له ) ، وبعد مدة نسمع عن محمد أنه انسحب من اول سنة تخصص له .
او نلاحظ في تويتر اسئلة مثل ، انا انتهيت من سنة أولى ومعدلي مره نازل ايش اسوي هل انسحب افضل ؟ او انه طبيعي ؟
خلوني انا اجاوب الآن واقولكم ان الموضوع جدا جدا طبيعي و كلنا مرينا بهذه الشعور
معكم طالبة طب سنة رابع ( خبرة خمس سنوات في المجال الصحي ) راح اذكر لكم تجربتي عن سنة اولى في جامعة الإمام محمد بن سعود الإسلامية ، والنصائح اللي ممكن تفيدك مستقبلا
قبل ما ابدا خلونا نتفق على شيء (ان سنة اولى طب تختلف عن التحضيري ) وللأسف هذا اللي سمعته في البداية ، في ناس عشان تهون عليك تقولك : لا تشيل هم ترى سنة اولى سهله زيها زي التحضيري او اصعب بشوي بس بالراحة تجيب فيها معدل مرتفع . وتخليك ترفع سقف طموحاتك انك بتجيب 5/5 بسنة اولى
بقولكم وجهة نظري ، سنة اولى تعتمد على تأسيس الطالب وإعطائه خلفية عامة عن جسم الانسان (فسيولوجية الجسم والعلاقات الحيوية التي تحدث داخل أجسامنا ) وبالإضافة إلى المخلوقات الحية الدقيقة التي تسبب الامراض و الالتهابات وغيره
باختصار سنة اولى تعتبر أساس الطب فالجهد فيها ضعف التحضيري والمعلومات اعمق وادسم !
طيب نجي لتجربتي
لمن دخلت سنة اولى خصوصا الترم الاول كنت مستمتعة بس بنفس الوقت ضايعة، ليش؟ لان فيه بعض المواد معلوماتها عميقة ودسمة مثلا ( معلومات عن كل فايروس أو بكتيريا وكيف آليتهم لحدوث المرض ، وصور تشريح دسمة وزحمة ) وغير كذا تجي الدكتورة وتقولك : لا تعتمدين على شرحي او السلايد و ارجعي للكتاب واقرأي . فكنت اتوقع ان كل شيء معنا وراح يجي بالاختبار فصرت احفظ اي شيء قدامي من صور وارقام و غيره (وركزوا على كلمة احفظ - من الدسامة بعض الأوقات ما كنت افهم اعتمد فقط على حفظ )
وبرضو كنت احاول اقرا من الكتب بس ما كنت افهم يعني باختصار الوضع كان شبه كارثي .
فانتهيت الحمدلله من الترم الاول وجاء الوقت اللي اشوف فيه معدلي
وهنا كانت الصدمة : اتذكر وقتها اتضايقت، لاني كنت أذاكر وانعزل بنفسي واعتذر عن الجمعات لاجل المعدل العالي، بس للاسف ما حصل ، وقعدت وقتها اقول ، اذا من بدايتها كذا درجاتي فماله داعي اكمل خليني ( انسحب بكرامتي ) .
بس جزء من مخي يقول لي اسألي اللي اكبر منك واسألي صديقاتك وشوفي الوضع كيف ؟ هل انت لوحدك ضايعة ولا فيه مثلك ضائعين ؟
وفعلا استغليت اجازة الترم الاول وانا اسأل و اذكر كلامهم كان : طبيعي ماعليك وصدقيني مع الوقت راح تتعودي على المعلومات ، يا بنت الحلال هي سنة اولى كذا ، لا تتوترين ! والله يعافيهم يا رب شاركوا خبراتهم ونصائحهم.. هدأت واقتنعت ،وفعلا مع مر السنين اكتشفت ان كلامهم صحيح 100٪ .
والان بصفتي طالبة انهت سنة اولى حابة اعطيكم بعض النصائح واحفظوها كويس :
اولا : طبيعي جدا انك في اليوم تخلص محاضرة وحدة واذا اثنين كثر الله خيرك (لا تحس انك بطيئ استيعاب ابدا )
ثانيا : طبيعي جدا وعادي انك تجلس ساعات تترجم ( وابدا اللغة الانجليزية ماكانت عائق ) خصوصا اغلب الدراسة راح تكون بمصطلحات طبية يعني اللي يعرف انجليزي او ما يعرف راح يحفظها . ،كثير اشوف الناس تسأل بوسائل التواصل : انا لغتي الانجليزية متوسطة اقدر ادخل طب ؟ . اكيد تقدر
ثالثا : طبيعي جدا ان معدلك بالبداية ما يكون مرتفع ( ولا تقارن/ي معدلك مع غيرك )
رابعا: طبيعي جدا ان الدكاترة يجيبوا لكم case حتى لو كنتوا بسنة باولى ( اتذكر في بداية السنة انصدمت باول ميد فيه كم سؤال حالات - علما ان محد دربنا عالحالات بس تعودنا خلاص )
سؤال طيب انا طبقت النصائح هذه والحمدلله تعايشت مع الوضع ، هل فيه امل اني ارفع مستواي بسنة اولى ؟ اكييد تقدر
من تجربة :الحمدلله يا رب عرفت اتخطى صدمة المعدل واشتغلت على نفسي ، وارتفع معدلي نهاية سنة اولى حتى مستوى فهمي اتغير للاحسن الحمدلله ، ركزوا معي …
1- لا تسمع لكلام احد سواء مدح او ذم ، انت بنفسك شوف المحاضرة وقيمها بناء على معاييرك
تجربتي : انا كنت اشوف البنات يتحلطمون عن مادة او دكتور وخلاص اخذ فكرة سيئة عن المحاضرة وماعاد اعرف اذاكرها واجلس اقول صعبة وانا اصلا ما قرأتها حتى
2- ركزززز مع الدكتور كويس ولاحظ الجزئيه اللي يعديها وما يشرحها ( يعني skip ) والجزئية التي يعيدها أكثر من مرة هذا معناته مهم وممكن يجي بالاختبار
تجربتي : مثل ما قلت لكم فوق كنت احفظ كل شيء ، حتى الشيء اللي يسوي له سكيب كنت اذاكره والصراحة ( ما استفدت )
3- لاااا تعتمد على نفسك في المذاكرة والشرح !. يعني اذا غبت عن المحاضرة . لا تشرح لنفسك او تحفظ المعلومة بدون فهم . انت لسه سنة اولى تحتاج تتأسس كويس . أرجع لاسهل مصدر انت تحبه يوتيوب او كتاب اي شيء ممكن يسهل عليك وتفهمه كويس . (وهذه من النصائح القيمة اللي غيرت لي مستواي وصرت فاهمة انا ايش جالسة اذاكر )
تجربتي : انا كنت اشوف ان مقاطع الفيديو مدتها ساعة الى ساعتين فكنت اقول ماراح اضيع ساعتين من وقتي خليني اعتمد على نفسي ، وهذا غلط
4- لا تيأس لا تيأس لا تيأس ، فيه جامعات ممكن نظامهم بالبداية يكون بلوكات وتنزل لهم درجة الميد بدري وتكون اقل من المتوقع فيجي الطالب محبط ويصير عنده تبلد (اذا انا ماجبت كويس في الميد ، فمستحيل اجيب درجة حلوة بالفاينل )
نتكلم بصراحة احنا طلاب الطب اتعودنا ناخذ الدرجات الكاملة او ننقص درجتين او ثلاث ويكون الوضع عادي سواء في المتوسط او الثانوي حتى التحضيري ، بس الطب ترى غير شوي يعني ممكن تنقص 5 درجات او حتى 10 درجات في اختبار واحد وممكن اكثر وممكن اقل
عشان كذا من الاشياء اللي مرا انصح فيها ( ان طالب سنة اولى يكون مجهز نفسه ويعرف ان في الطب مو شرط تاخذ full mark )
تجربتي : انصدمت لما شفت درجات الميد وجلست الشهرين الباقية وانا اتحلطم بدال ما استغل الوقت واذاكر للفاينل . وهذا غلط طبعا ، خلاص اثق بالله واهم شيء اشوف ايش الاغلاط اللي سويتها وقت مذاكرة الميد واحاول اتجنبها بالفاينل حفاظا على درجاتي الباقية .
هذه كانت تجربتي لسنتي الاولى في الطب البشري فانا اعتبرها اعظم السنوات التي مرت خلال مسيرتي الدراسية ، وهي ايضا من السنوات التي لا تنسى بمرارتها وحلاوتها ، و رغم الصعاب التي واجهتها الا انها اعدتني جيدا لما هو قادم .
وفي النهاية من اخت الى اخوانها واخواتها اطباء وطبيبات المستقبل : تذكروا دائما حسن الظن بالله والتوكل عليه ، اجتهدوا وذاكروا وربي باذن الله ماراح يضيع لكم اي مجهود بذلتوه ، اسأل الله لي ولكم التوفيق والسداد.
كتابة : مروة مغربي تحرير : نوف النهدي تصميم :اسراء متولي