اتخرجت وجاء الوقت اللي لقيت نفسي لازم أسوي فيه CV وحسابي في Linked In لازم يكون احترافي وحوسة عشان أبدأ حياة الكبار 🥲، وقتها قلت هو لازم أكمل في هذي الحياة؟ 😔
ولكن اكتشفت إني كنت أسوي أشياء من وقت ما أنا في الجامعة وهذي الأشياء ساعدتني وقللت العبء علي في أولى خطوات حياة الكبار وحياة دفع عجلة التنمية 🫡
ف بحول الله بأكتب في هذي المدونة راح تلاقوا بعض النصائح والطرق اللي اتعلمتها وطبقتها ولعلها تساعد أحدكم وبتفيدكم سواء كنتوا خريجين أو طلاب🙏🏻
■ أحد أكثر الأشياء الي ممكن تدوخ الواحد إن كل شيء عنده في مكان مختلف 😵💫
ف وقت مايجي الشخص يسوي ال CV راح يزيد الصداع ومايلاقي شهاداته والأشياء اللي كان يسويها وينجزها لأنها مبعثرة كل شهادة في جهة 😔
الحل بسيط بس يحتاج شغل، نجمع كل شيء في مكان واحد ويفضل يكون أونلاين زي قوقل درايف، ولكن كيف؟ 🤔
في الدرايف حقنا نقدر نقسم كل شيء لملف ونشتغل إن كل شيء نحصل عليه نحطه أول بأول في الدرايف، وعشان يكون الدرايف حقنا مرتب ممكن كمان نقسم كل ملف رئيسي لعدة ملفات فرعية، بحيث تساعدنا إن مثلا يكون في ملف خاص للشهادات، وجوته ملفات لسنوات عشان يكون مرتب أكثر 🫡
وهذي الصور كمثال على الدرايف حقي وكيف رتبته:
■ التوصيات هي ورقة نطلبها ووجودها حلو حتى لو ما استخدمناها، ولكن متأكد إن حيجي وقت وراح تفيدنا 🫡، ودايما نحاول نغطي توصيات لكل مجال عمل يتعلق بتخصصنا حتى لو ماكنا نبغاه ونعيد هنا المقولة (لعل يجي يوم نحتاجها، وجودها كويس ومايضر)
- المجال الاكلينيكي (توصيات من المستشفى)
- المجال البحثي (من مشرفين الأبحاث)
- المجال الأكاديمي (من دكاترة الجامعة)
توصيات المجال الأكاديمي والبحثي تفيد كمان في دراسة الماستر والابتعاث
ودايما نكون حريصين التوصيات ماتكون قالب ثابت وبس يضيفوا اسماءنا، الأفضل تكون مذكورة فيها تفاصيل عن ليش أعطونا التوصية والصياغة والتفاصيل تختلف من كل شخص لشخص لأن النموذج الثابت للتوصية يعطي انطباع سيء أو إنها توصية توزع للكل سواء كانوا كويسين أو لا 😅
في المستشفى مثلا لو في أحيان سوينا مهام محددة مو دايما الانتيرن يسووها ف هنا ممكن نطلب من الشخص الي يعطينا التوصية إنه يذكرها وممكن توصية وحدة تشمل أكثر من مجال (أكاديمي وبحثي ... الخ)
■ خلصنا ترتيب الشهادات وملفنا الشخصي وكل شيء صار قدامنا 🫡، هنا نقول يلا نبدأ نسوي ال CV 😁
أغلب جهات التوظيف تستخدم برامج ذكاء اصطناعي في فرز السير الذاتية للمتقدمين، عشان كذا ضروري تكون ملفاتنا وال CV حقنا متماشي مع المتطلبات اللي يركز عليها الذكاء الاصطناعي، أسهل طريقة إننا نعرف بيه هذي المتطلبات إننا نشوف الوصف الوظيفي لتخصصنا من برنامج ذكاء اصطناعي وكمان كمثال ممكن نروح للشيخ ChatGPT ونقوله اكتبلي الأشياء الي لازم تكون في ال CV بناء على تخصصي عشان يقرأها برنامج ال AI وادخل في الفرز، نقطة بسيطة بس تلعب دور كبير في التوظيف 😉
ال CV من رأيي ممكن نستعين بشخص صاحب خبرة يسويه (أفضل عشان يكون احترافي) + ممكن احنا نسوي نموذج ونقول للذكاء الاصطناعي يحسه بأفضل طريقة عشان يكون مطابق للمعايير المطلوبة
وهذا المقطع من الرهيبة جدا أ.كوثر فارس، راح يفيدنا مررة بشكل ما تتصوروه لو احنا قررنا نسوي ال CV بنفسنا: 😎
دايما من المهارات الي تنكتب في ال CV إننا مرنين، طيب تعرفوا إن ال CV لازم يكون مرن كمان؟ 🤔
المرونة في ال CV تكون في تغيير الشهادات والخبرات بناء على الوظيفة المقدم لها، يعني مثلا لما أقدم على أخصائي مختبر في قسم الهيماتولوجي أحط شهادات هيماتولوجي وماتكون محطوطة مثلا شهادات كميستري وهيك، ف يكون ال CV مرن ويتغير بناء على الوظيفة المتقدم لها 👍🏻
■ نجي لشيء مرة مهم وهو لينكد إن: وبالمناسبة ترى في دورة رهيبة راح نسويها في ميديوكولجي عن الاحترافية في لينكد إن وكيف نستعمله الاستعمال المثالي، وهذا رهو البوستر حقها 🫡
البرنامج اللي اتمنيت أحد نصحني أبدأ فيه وأشتغل عليه من أيام الجامعة 😔 ولكن ترى للآن ماراحت الفرصة علينا ونقدر نفعله كويس 🫡
ثريد بسيط رهيب من أ.كوثر فارس عن أشياء تسووها في حسابكم في لينكد إن وبتطلعوا بشكل احترافي ورهيب
وأحد الطرق الحلوة لتطوير حسابنا في لينكد إن إننا نتابع حسابات ناس محترفة ولهم مدة في المجال وناخذ أفكار منهم وطرق لتعديل وتطوير حساباتنا ونخليها رهيبة واحترافية لأبعد درجة 😁
ممكن ننزل بوستات بشكل مستمر عن الإنجازات اللي قاعدين نسويها + معلومات علمية عن مجالنا (هنا بأعطيكم التريك اللي أنا أتبعه في صياغة المحتوى 😎، المحتوى العربي لعبتي وما أحتاج مساعدة، ولكن كمان لازم أكتب بالانجلش ولو صغت بنفسي حأطلع حاجة حلوة أوك بس مو مرة احترافية، أنا دائما أكتب المحتوى بالعربي وأروح للشيخ ChatGPT وأقوله "صيغ لي العبارة التالية باللغة الإنجليزية بطريقة احترافية لاستعمالها كبوست في لينكد إن" ولكن ما أكتفي بهذا بس لأن برضه صياغته مو مرة واو، ف هنا الدور للمعلم الكبير Grammarly و يصيغ لي بأحسن طريقة وبالذكاء الاصطناعي 😉، بهذه الطريقة حأضمن إن الأسلوب يكون قريب مرة من أسلوبي في الكتابة وهنا في هذا الرابط تلاقو شرح رهيب (هنا)، كل الي علينا ننسخ صياغة ChatGPT ونخلي Grammarly يسنعنا 🫡
لكن لاتنسوا تعدلوا بنفسكم على الصياغة لأن برضو لازم إحنا بنفسنا نعدل ونتأكد ونحسن محتوانا 👍🏻
رتبو ملفكم في لينكد إن وأضيفوا شهاداتكم وكل شيء ممكن يفيدكم 😁، الخطوة هذي بحول الله راح تساعدكم كثييير في مسيرتكم المهنية
وهذا حسابي في لينكد إن لعله يفيد أحدكم بطريقة ما وتشرفوني وتنوروني 😊
وهنا أكون وصلت لنهاية المدونة و ان شاء الله أفدتكم
ولاتنسوني من دعواتكم 😊
كتابة : عبدالله الجهني ، تصميم : إسراء متولي