طبعا راح نعيد على النقاط المذكورة في تدوينة الاسبوع اللي راح بشكل موجز و بسيط و اللي مو متذكر الدرس يرجع له (هنا) كانت الخطة أن اتقانك النقطتين اللي راحت هدف سامي و شريف وان تطبيقك لهم بيسهل عليك هالنقطة وأبدًا مو بقصد ان نحمسك تتابع جديدنا 😝
على العموم اكيد شفت الفرق و متاكدة 💯 بأن الموضوع ماكان نسبي باللي طبقها بالحرف الواحد، بالذات أن مافي مخرج طوارئ 🚨 للافكار الا بالتدوين، وعلى طاري ما لاحظت طريقة تعبيرك تحسنت و حتى انك حاسس مافي اي تشويش ولا اي معلومة مب قادر تصنفها ايوا هذه هدفي… متخيل ان عقلك يحمل ملايين من الافكار ولا عنده ارشيف لكن بهذه الخطوة انت سويت مخزن و رف لكل معلومة برافو. واكيد اللي طلبوا من متجر ماديجتالز للاجندة وصلتهم و بدأت الامور عندهم اوضح.
اما على الرياضة الأكيد لاحظت مدى طولة بالك.. اذا كنت من الفئة اللي يعانون من المشتتات و حتى من نسمة الهواء تضايقت ابصم لك بالعشر ان الموضوع بدأ يتحسن اكيد مب ساحره لكن سبق و جربت و شفت النتيجة السحرية، و ازيدك لاحظت ان مافي خمول ولا كسل بالعكس مندفع للحياة و لن ينجو منك اي شابتر بعدها 😁
طيب من الاسبوع اللي راح و للان نفكر و تدور في بالنا مليون معلومة وووووش هي النقطة الثالثة يانوف وش هذه الغموض اللي يحمل في طياته 7 ايام ؟
اقولك الوصفة ؟ الرسم ايوا ايوا الرسم لا تقفل المدونة ما نمزح معك، طيب نوف ترى إمكانيتنا محدودة حدنا شمس في الزاوية و بحر و معلقين على صف رابع إبتدائي في حصة الفنية.. مين قالك طلع فان جوخ و ارسم لنا موناليزا ؟ تدري أن الرسم وصل لمراحل متقدمه ويخدم جميع فئات المجتمع انطلاقًا انه قادر يحلل شخصية الأنسان و حتى انهم يعترفون فيه بعلم منفصل، و يستعملونه في سيكلوجية الطفل وو.. و هنا بالذات له دور كبير في زيادة و توسيع افاق العقل.. والحين صار موضوع اسهل بكثير من اول بدال ماتروح المكتبة و تدور كراسة و قلم بالبيت.. كثير تطبيقات في اجهزتنا اللوحية تتيح لك ترسم او حتى تساهم في التلوين بغض عن المجهود العقلي المبذول لكن صفاء الذهن بعدها مايقارن بأي صفاء ثاني
انتهت نقاطنا الثلاث، ان شاء الله كانت بسيطة و مثرية.. فالكم اعلى الدرجات.
كتابة: نوف النهدي تصميم: اسراء متولي