هل قد مر عليك عزيزي القارئ السيناريوهات التالية:
أثناء الاختبار وانت تعرف (مكان) الإجابة في أي سلايد بس ما تتذكر الاجابة ( نفسها ) ؟ او تجتهد مرا و تكون واثق أن معدلك هالسنة بيرتفع ولكن ! لاحظت معدلك ثابت او ارتفع شيء بسيط لا يذكر ، او بعض الاحيان تحس أنك ضائع ودك تجيب درجات مرتفعة زي أصحابك بس مو قادر، وكمان مو عارف وين الخلل؟
احب اقولكم بحكم خبرتي المتواضعة في دراستي للطب أن الموضوع ( 80٪ له علاقة بطريقة المذاكرة )
ونصائحي اللي راح أسردها هي من واقع تجربة لسنوات طويلة
خلونا نتفق أن فيه فرق بين المذاكرة بالطريقة التقليدية و الطريقة الفعالة و المقصود بالفعالة هي المذاكرة بذكاء وفي وقت اقل ، والمعلومات ترسخ بالذهن وسهل استرجاعها وتذكرها أثناء وحتى بعد الاختبار ، و أيضا لازم نعرف أن كل واحد فينا يفضل طريقة معينة
ولكن ماهي المذاكرة الفعالة ؟
اولآ : أستقبال المعلومة
كل طالب له طريقة لأستقبال المعلومه بعض الطلاب يعتمدون على المقاطع واليوتيوب والاخر يعتمد على سماع الدكتور فقط و البعض يشتري مجسم لهيكل الانسان ويتعلم من خلاله والاخر يهتم بقراءة المراجع و يكتفي، اما أنا كنت أعاني بصراحة مع شرح الدكاترة فأعتمدت على اليوتيوب والمقاطع
( وحقيقه أعتبر اليوتيوب من أفضل الطرق لتوصيل المعلومة لأن الموضوع ممكن تلقى عليه شرح مدته دقيقة او شرح مدته اربع ساعات على حسب رغبتك في التعمق ) ، والمعلومات ترسخ بالذهن لدرجة بعض الاسئلة بالاختبار كنت أحلها على خلفيتي من المقاطع .
ثانيا : هل أحفظ كل شيء ؟
حاول انك تذاكر بذكاء و لنفترض انك ذاكرت كل شيء من الالف الى الياء كذا راح ترهق عقلك و استيعابك ويضيع الوقت عليك وخذوها مني (مستحيل كل شيء راح يجي بالاختبار )، نصيحتي لك ركز وبقوة على اللي يعيده ويكرره الدكتور ولما ياخذ نقطة ويتعمق فيها أعرف انها مهمة ( لأن الدكتور عارف ايش المهم لمستواكم ) ، و لما ينتقل من صفحات من غير ما يشرحها ( معناته ممكن مهمة ولكن ماراح تفيدك الان - او انها معلومة إضافية ) ما يمنع انك تسأل الدكتور ايضا .
برضو الدكاترة لما يقولوا ( المعلومة هذه راح تنعاد وفي سنوات التطبيق او راح تشوفوا هذه الحالة في المستشفى) نصيحة : احفظوها وافهموا الحالة كويس ليش طيب ؟
1- تلميح ، ممكن تجي هذه الحالة بالاختبار
2- الامراض في الثلاث السنوات الأولى كثيرة وممكن تلخبط و انا شخصيًا كنت اشيل هم لما أحفظها ، ولكن الدكتور فاهم وعارف ايش الحالات اللي راح تتكرر علينا مستقبلا
ثالثا : نظم وقتك
تجربتي بتنظيم الوقت كانت صعبة بالبداية لان كنت أرجع من الجامعة وأنام إلى المغرب وبعدها أجلس اذاكر إلى اخر الليل وللآسف صرت احس أن اللي ذاكرته نسيته بسرعة و كأني اول مره اقرأه.. و حاولت أغير روتيني صرت اول ما ارجع من الجامعة اريح نص ساعة وابدا أراجع اللي اخذته الى المغرب وبس ! ويصير وقت الليل وقتي لنفسي ولاهلي ، و الحمدلله يا رب لاحظت تغير بمستوى فهمي و المعلومات صارت ثابته بعقلي . ومن بعدها اكتشفت ان مخي ما يستقبل اي معلومة بالليل مهما اخذت قيلولة وترى فيه ناس العكس ، اعرف زميلاتي مستحيل يذاكرون بالنهار ويستغلون فترة الليل لأنها طويلة وهدوء نصيحتي شوف الوقت اللي يناسبك ومافي مشكله انك تجرب كذا وكذا ، ممكن فعلا تطلع المشكلة فقط باختيارك لوقت المذاكرة .
رابعا : هل الملخصات مهمة ؟
فيه طلاب ممكن ما تعجبهم فكرة الملخصات بسبب انها تاخذ وقت بس انا اشوفها العكس تماما ، بقولكم ليش؟
معلومات المواد دسمة ! وبعض الأحيان المرض ممكن ياخذ خمس محاضرات مختلفة، فهل معقوله أني اقرأ الخمس المحاضرات كاملة إلى يوم الاختبار ؟ واذا احتجت اراجع معلومة معينة اضيع بين السلايدات عشان الاقيها ؟
طبعا لا.. من البداية أسوي ملخص عن أهم النقاط وبدال ما يكون مجموع السلايدات 150 يصير عدد صفحات الملخص بالكثير اربع صفحات واحرص أني وانا أكتب الملخص أحفظ المعلومة عشان ما يضيع الوقت، طبعا محتوى الملخص على حسب الشخص ممكن يكون مفصل ( انا افضل كذا ) او يكون مختصر ، او فقط ملخص للأرقام و النسب و التحاليل وغيره …
تجربتي مع الملخصات : لمن ادخل الاختبار الشيء الوحيد اللي يبقى بمخي هي الالوان والخرائط حقت الامراض، حتى لما اطلع اتمشى ويجيني تأنيب ضمير ليش ما اذكر ؟ انا مو مضطرة اني أجيب الايباد معاي بس اقدر اجيب اربع صفحات واجلس اذاكرها بالطريق منها استغليت الوقت ومنها حفظت المعلومات كويس .. و أيضا هالطريقة مثرية حتى بعد التخرج مستقبلًا في المستشفى بدال ما أرجع للايباد و احاول أحصل على النقاط المهمة بين الكلام الكثير ، خلاص انا عندي ملخص لكل المهم.
هذي تجربتي كاملة بالمذاكرة أتمنى تفيدكم مثل ما فادتني.. ولا تنسوا تحسنون الظن بالله والتوكل عليه واسأل الله لي ولكم التوفيق والسداد
كتابة : مروة مغربي تحرير : نوف النهدي تصميم : اسراء متولي