سنة الامتياز سنة جميلة رهيبة، مليانة تجارب جديدة ومعلومات كثيرة، فيها راح نكسب معارف ونتعلم على أشياء ماكانت متوفرة لنا في الجامعة ولكن كيف ممكن أتعلم بأحسن طريقة وقت الامتياز؟ أو إيش ممكن أخلي هدف تعلم كطالب مختبرات في سنة الامتياز؟ 🤔
بدأت رحلة عبدالله لسنة الامتياز باختياره للمستشفى اللي كان يبغاه، و جاء الدوام وبدأ عبدالله الممارسة الإكينيكية الفعلية للمرة الأولى في حياته، عبدالله كان عنده فكرة وتوجه وخطة لأيش ممكن يتعلم من قبل ما يبدأ سنة الامتياز، هذه الخطة ساعدته كثير وفعليا بدأ في تنفيذها من أول يوم في حياته ك انتيرن 🫡
قبل ما أبدأ في سرد الخطة بأرجع بالزمن شويتين للوراء، تحديدا في السنة الثانية من دراسة عبدالله لتخصص علوم المختبرات الإكلينيكية، عبدالله سمع مقولة من دكتوره في محاضرة وقت محاضرات الأونلاين واستمرت طول السنين في إذنه الين وصل لسنة الامتياز، المقولة كانت "في المختبر وقت عملك لا تكون بِلية"، طبعا كلنا ما فهمنا ايش بِلية هذي لأنه كان مصطلح مصري، ف شرحلنا الدكتور مقصده وكان معنى بلية هو الولد اللي اتوفى أبوه وهو في عمر صغير وأمه اضطرت تسحبه من الدراسة وتخليه يشتغل مع صنايعي عشان يكون عندهم دخل ياكلوا منه، ف بِلية مع الوقت راح يتعلم الصنعة ويصير معلم ولكن هل راح يكون فاهم الصنعة أو بس يمشي شغل؟ 🤔
ف كان الجواب المنطقي إن بِلية صح إنه اتعلم الصنعة ولكن ما أخذها عن علم، ف ممكن لو كان بِلية ميكانيكي، حيقولك والله ترى العطل في سيارتك كذا، وإذا سألته طيب إيش سبب العطل، كيف ما أخليه يتكرر، ... الخ، بلية ماراح يعرف يجاوب، لأنه يعرف بس كيف يصلح العطل ولكن مايعرف ليش صار وكيف وإيش ممكن نسوي عشان ما يتكرر
كأننا خرجنا شوية صح عن المختبر ودخلنا في شيء ثاني؟ 😅
هو صح خرجنا ورحنا لأعطال وصناعيين ولكن القصة تهمني كثير لأنها بتفيد فكرتي وخطتي وهدفي أكثر 🫡
كان هدف عبدالله وقت الامتياز إنه يركز على إنه يتعلم مبدأ عمل كل جهاز "Principle"، لأن أي شخص يقدر يتعلم كيف يدخل العينة في الجهاز ولكن مو شرط يكون فاهم كيف الريآكشن صار داخل الجهاز وكيف طلعت النتيجة، ف الشخص الفاهم لهذا الشيء حيكون أخصائي مختبر، الشخص اللي بس يعرف يمشي العينة بدون مايفهم كيف طلعت النتيجة، ليش اخترنا هذا النوع من العينات، ليش طيب هذا التيوب، راح يكون زي صاحبنا بِلية (حافظ مش فاهم)، والشيء اللي مرة كان يزعلني لما أشوف كثييير من الإنتيرن ينبسطوا لما يدخلوا العينات في الجهاز ويحسبوا إنهم اتعلموا خلاص وبالعكس هنا راح يكرفوهم وفي الأخير هم اللي يمشوا الشغل لأنهم يحسبوا إن خلاص اتعلمنا المهم ونبدأ نشغل 😔
وطالما اتكلمنا عن الأجهزة ف خلونا نكمل فيها شويتين، كان من أهداف عبدالله إنه يتعلم مثلا لو صار خلل في الجهاز إن يكون مع الأخصائي أو المهندس ويشوف ويفهم كيف صار الخلل وكيف ممكن يتعالج ويتصلح، صح ممكن ماراح تقدروا دائما تكونوا مع المهندس والأخصائي وقت الصيانة ولكن لو حصلت ف راح تكون فرصة حلوة 👍🏻
أحد أهم الأشياء في المختبر هو ال "Quality Control"، ممكن يكون وقت الجامعة والدراسة حاجة غثيثة وصعب فهمها ونصدع واحنا نذاكر لها، لكنها حاجة مرة حلوة وممتعة وقت نكون في المستشفى ونتعلمها صح، ف كان هدفي إني أركز على الجودة وأطور نفسي في هذا المجال، صح دخلت بخلفية حلوة لأني كنت أحضر دورات الرهيبة كوثر فارس عن الجودة واللي من تنظيم ميديوكولجي 😎، ف لما دخلت أنا كنت عارف كثيير عن الجودة وأساسياتها وطبعا مع الممارسة بدأت ترسخ هذي المعلومات وتزيد ونتوسع أكثر وأكثر، ف لو انعادت الدورة مع كوثر فارس نصيحة لا تفوتكم 😍
وكمان كنت حريص أعرف كيف نتأكد إن النتيجة فعليا صحيحة سواء ارتفاع أو انخفاض، ف هذه الشيء راح يساعدكم فيه المعلومات النظرية اللي أخذتوها من الكلية وكمان راح تتعلموا الإجراءات في المختبر عن كيف نتأكد من إن النتيجة صحيحة وفعليا هي نتيجة المريض بمختلف الطرق الممكنة للتأكد، زي مثلا إننا نعيد العينة ونقارن النتيجتين، أو إننا نعتمد على "Delta Check" هي مقارنة نتيجة المريض اليوم بنتائجه في الأيام الماضية، وكمان ب الكشف على العينة نفسها وممكن تكون ماهي مقبولة وكذا
اتكلمنا عن الأشياء اللي كنت مخطط أتعلمها، وخلينا نجي للمارسة نفسها وكيف اتعلمت، في كثير من المرات كنت أحب أتعلم ذاتيا وأشوفها أحسن طريقة، إني أنا أدور المعلومة بنفسي وأقرأ وأبحث وأشوف وأتعب الين ألاقيها، وبرضو ماخاب من سأل ومرة كويس إنكم تسألوا وتتعلموا من الناس اللي لهم خبرة، بس مع الأسف مو الكل راح يعلم، ومو الكل فاهم أصلا، وصح لازم تعرفوا متى تسألوا وكيف ومين تسألوا، لأن هذه عوامل تلعب دور كبير في إنكم تاخذوا المعلومة
وهنا طالما جيت عن الأسئلة ف هذي نصيحة من عبدالله، مو دايما المعلومة الي تنعطى لكم تكون صحيحة بالكامل أو صحيحة أصلا، ف اعتمدوا إنكم دايما تتأكدوا من كل شيء، بعض الأحيان ممكن تبان معاكم من الشرح أصلا إن ترى والله المعلومة خطأ، ف هذا الشعور كويس لأن حتروح تبحث بنفسك وتتأكد من المعلومة وفي طريقك كمان راح تأخذ معلومة معلومتين إضافية مع المعلومة الي رحت تتأكد منها
أحس إني طولت عليكم فهذه آخر نصيحة وبعدها راح أختم، لا تشتغل وانت لحالك وما معاك موظف، لأن الشغل حساس وأي خطأ راح تتحمله، ف لما يكون معاك موظف راح تقدر تتدارك الخطأ ويكون معاك شخص يوجهك
ختاما يارب تكون سنة الامتياز سنة ممتعة عليكم وتخرجوا منها بأكبر قدر ممكن من المعلومات والمعرفة وموفقين يا أخصائيين المختبر الرهيبين 🫡
كتابة: عبدالله الجهني تحرير : نوف النهدي تصميم: إسراء متولي